حبه فضفضه

احساس من اصعب ما يمكن
لما تحس ان فى حاجه جواك بتوجعك قوى بس مش قادر تعرف ايه هيا او حتى توصفها
احساس طال معاك قوى ومن كتر ما طال وصلك لمرحله انك مش قادر تعرف
هوه انت الصح ولا الغلط..
انت الطيب ولا الشرير..
هوه انت اللى بتجرح الناس ولا الناس هيا اللى بتجرحك..
وممكن تكتشف فى الاخر ان انت الغلطان او انت الشرير وانت اللى طول الوقت ده بتجرح فى الناس وواهم نفسك ان هما اللى بيجرحوك
الاصعب من الاحساس ده
انك تحس ان فى حد جاى من بعيد وبيبتسملك بيقولك انا هنا متخافش
انا هامسك ايديك وهاعديك
احساس الحزن والضياع اللى انت حاسه ده لايمكن يبقى موجود عندك وانا هنا
انا هنا عشانك انت وبس
وتجرى عليه عشان تترمى فى حضنه وتعيط
بس للاسف تكتشف انه سراب وهم فى خيالك انت وبس
وان الامل ده مكنش اكتر من مجرد الم جديد هاينضاف لمكتبه الامك
عشان يجدد جروحك القديمه وتتوجع من تانى
بس المرادى الوجع اقوى
والامل بيقل
والالم بيزيد
توصل لمرحله تبص فيها حواليك تلاقى نفسك مش قادر توصلها
ضايع وضايعه معاك نفسك
تحاول تفكر تلاقى نفسك عاجز
تدور على حد تستمد منه قوتك تلاقيه
بس تلاقى جنبيه الى بيموتك
تدور على دموعك تلاقيها خلصت
متلاقيش غير انك تحضن نفسك بعيد
من غير ما حد يشوفك او يحس بيك
عشان ترجع تانى وانت راسم الابتسامه الجميله على وشك
اللى بتدارى وراها اااه محدش يسمعها او يحس بيها غيرك
بتنزف من جوه
بس من بره صافى وجميل
بتصرخ وتقول اه
بس على وشك هدوء الدنيا
تمثل انك لوحدك اقوى ومسيطر على كل حاجه
بس انت من اضعف مخاليق ربنا
محتاجله قوى
بس عمرك ما هتتطلبها منه
تدور على حاجه تشغل بيها نفسك عشان تمثل عليها انك نسيت وارتحت
بس الواقع انك بتموتها اكتر
بس هانعمل ايه
هيه دى الدنيا
محدش فيها مرتاح
الحمد لله على كل حال